شباب .. خلوها بيننا

السلام عليكم

في موضوع حبيت نتناقشو فيه
رغم انه بسيط
الا انه مهم جدا جدا
وليه تاثيرات سلبية كبيرة ومؤلمة معظم الاوقات
شباب اسمحولي

صح ان المنتديات زي مايشتركو فيها الكبار
اكيد هيكون فيها مراهقين
بالاضافة ان البنات ايضا زي مافيهن كبار فيهن مراهقات
لحد هنا كويس
البنات لما يشتركو في منتدى ما .. يشعرو بحرية كبيرة في التعبير والفضفضة والنقاش
ويعتبر عالم المنتديات متنفس كبير ليهم
وتلقو البنت فيهم متحمسة جدا في الدردشة والهدرزة والعراك وهكذا
وتعبر باسلوبها الانثوي المرح الخاص بيها
وللعلم ان معظم المشاركات مش حاطين شي في روسهم
يهدرزو وخلاص سوا مع بنت ولا مع ولد
ومن حماس المشاركة انها اول ماتخش للمنتدى تلقى رسايل من الاعضاء
فتفرح وتفتح باش تعرف شن جاها
يعني .. كان الرسايل نوع من الهدايا
ولكن المفاجأة والصدمة لما تلقى ان نص الرسائل بين مغازلات وبين طلبات تعارف عاطفي
تصورو؟

يعني هذا جزاتها انها دردشت وفضفضت وعبرت مع الشباب؟
خلاص ضاقت ؟؟ حتى عالنت مش سالمات ؟؟
يبقى متستغربوش لو لقيتو المشاركات متوترات ويعاملو الكبير زي الصغير بحذر وتوتر
..............
عندكم حتى الظاهرة هادي
واحد يقعد يعبر ويهدرز مع البنات طول الوقت في المواضيع
ومرات تلقاه هو نفسه يحط مواضيع تعبيرية عامة تجدب البنات للرد
وبعدين فجأة لما يجي موضوع فيه تساؤل عن الدردشة في النت او حتى بشكل عام
يرد ويقول
البنت المحترمة او المتدينة حسب اختياره للتعبير
هي اللي متهدرزش مع الرجال
شن معناه هالكلام يعني ؟؟
معقولة هكي
للاسف هالظاهرة لطالما شفتها في المنتديات وخاصة منتدياتنا الليبية
سامحوني طولت
وسامحوني حبيت انزله الافي جلستنا ومش بشكل عام
لانه عيب كبير فينا لازم اندروله حد

والراي عندكم

والله اعلم

و عليكم السلام و رحمة الله و بركاته

كيف حالك شاب المدينة وين تغطس و تطلع

خلينا في الموضوع خير

صاح كل إللي قلته بس انت مصور البنات انهن مايعرفن شئ و مايقدرن ايميزن الكويس من العطيب

طبعا انا انجاوب فيك و انا ضد الدردشة الفاضية لما تنحرف عن خط الأدب و ايخش فيها الالفاظ إللي ماحد ايحب يسمعها قدام خواته و مش بس الدردشة حتى المواضيع

انا شخصيا ننسحب نهائيا من اي موضوع يذكر فيه لفظ خارج حتى و لو في سبيل المزاح

تعرف ليش لاني الكلام هذا مانقولش فيه قدام خواتي
و اي حد يشترك في منتدى يقول بيتي الثاني .. انا نخجل من دخول الموضوع اكراما لخواتي إللي في المنتدى و لاني نحترمهن و ما نحب حد ايزل بلسانه قدامهن و يشعرهن بالخجل و كما قلت حتى لو مزاح

انا مع الدردشة انك تسأل عن الحال .. العائلة .. الصحة او العمل .. تتناقشو في موضوع معين في اطار المنتدى

اما ماعدا ذالك كلام زايد ..كيف تسأل وحدة كم عمرك او اي سؤال شخصي .. ايش مالك و مالها انت تسأل هالسؤال

في النهاية انا مع اي شئ محترم مؤدب سواء دردشة او شات او موضوع

و ضد اي لفظ خارج و لو بالخطأ او نفسية تعبانة داخلة اتفرغ عقدها و تطلع

سامحني طولت عليك لكن الموضوع مهم و لازم يناقش

السلام عليكم

كيف حالك اخي شاب المدينه وين أتريح اتريح او اترد بقوه

مثل موضوعك الحساس الي هوا كألتالي

اي نعم انا كلامك مزبوط ميه بالميه مزبوط انا البنت لمتشترك في منتدي

اتحب اتكلم بكل شفافيه او عفويه او اتحب اتعارك او اتنبشاء او دردش بدون نيه بعيده

ولكن يأخي الي أيريد روحه قنطره ايتحمل الدوس

القصد انا البنت لماتدخل المنتدي تعرفه مع من اتحدث او دردش او منهوا هذا الي اتكلم معاه تمام

أكيد بعد تتحدث بعفويه راح تلقأه في صندوق الرسائل رسائل غراميه ولله شنو تتوقع انت من الشباب

بصدق نحكوا بصراحه اخي شاب المدينه لذلك كل بنت المفروض تعراف مع من تتعامل او لاأقصد بنات الجلسه حاش والله كلهن كيف خواتي

والشي هذا في الجلسه نحن نفتقدوا والحمدالله او اي شخص راح ايحاول ان يدخل بطريقه مهيش مزبوط راح يتعرض لطرد من الجميع

او اكيد منحطش اللوم كل علي البنات الشباب كذلك لهم دور كبير ا وفعال في الظاهره هذي هذي بالنسبه لنقطه الاولي او بعدين كيف ماذكرت ان البنات مهنش سالمات بره او جوا ياخي هذا حال الدنيا او الشباب او البنات نار او بنزين

أنجو لنقطه الثانيه الي ذكرته

الشخص الي يبقي ايهدرزا مع البنات في امور ملهش طعمه باالتاكيد راح نطلق عليه انسان فاضي أجوف

او مع أعتقادي الكلمه هذي تكفي لنقطه الثانيه او مفيش انسان معصوم علي الخطاء او بالنسبه لهدرزا مع البنات او ايقوالك البنت الي

تحكي مع الشباب مهيش محترام والله شنوا انقوالك الكلام هذا باالتاكيد مهوش مزبوط ولكن الهدراز اتكون في حدود الاحترام

او اموار العلم او الدين او النقشات العلميه عدا ذلك اخي شاب المدينه مع الشباب الي ايقوالك ان الهدرزا مع البنات غلط

ايه
حلوة الافكار اللي طرحتوها القناشي والزوي
لكن بالنسبة لخوي الزوي
يعني وحدة تنزل موضوع عادي وتعبر فيه
وكل الناس هيعلقو
وين هتعرف الصالح منهم والطالح
انا نفسي منعرفش منو الباهي ومنو اللي مش باهي

وبالمناسبة عجبتني فكرة منتكلموش مع البنات في مواضيع علمية ولا دينية
امالا في شنو هنتكلمو في الحب وبس
وبعدين في اللي عندهم ماجستير في المواضيع العلمية او الدينية
يعني منجوش في ظفرهم لو تجي في الصح
يعني ماهواش سبب مقنع
بس زي ماقال القناشي
الامور الشخصية ماليهاش داعي
حتى مع الاولاد حسب رايي

والله اعلم

يعني وحدة تنزل موضوع عادي وتعبر فيه
وكل الناس هيعلقو
وين هتعرف الصالح منهم والطالح
انا نفسي منعرفش منو الباهي ومنو اللي مش باهي


بالنسبه لهذي ساهله أخي شاب المدينه انت غير داوم معانا في الجلسه او الانسان يبأن ولوا بكلمه منهوا الطالح او منهوا الصالح

امالا في شنو هنتكلمو في الحب وبس
وبعدين في اللي عندهم ماجستير في المواضيع العلمية او الدينية
يعني منجوش في ظفرهم لو تجي في الصح

اكيد هذي النقطه الي انت قاصده الحب امال الشباب الطياش في شني يحكي اكيد في الحب او الكلام اهوه الفاضي

او بعدين مش مشكله الانسان عنداء ماجستير والله لا اهم شي النقاش او الحوار الهادف يأخي

او متقلقش من قيمة روحك رأك حتي انت انسان مثقف او متعلم ممكن الانسان الي عندا ماجستير ما ايجش في طرفك حاجه
ممكن ايكون ابداع في دارسته ولكن حياته العمليه يأخي فاضي مبفقهش فيه حاجه

أو أختلاف لوجهة النظر لايفسد لود قضيه