بسم الله الرحمن الرحيم
ماشاء الله ولله الحمد
احنا الليبيين اهل نخوة وعزة وكرامة
ومعروف علينا باننا فزاعة وقت الشدايد
ومهما تعاركنا مع خوتنا .. وقت الحق نطلعو تراسة ونرفعو الراس ونوقفو معاهم
هالمرة اهلنا وعربنا في قطاع غزة فوق من محاصرينهم ومجوعينهم اليهود
وفوق من انهم حاصلين في صراع السلطة بين فتح وحماس
القصف الاسرائيلي ليه ليه نازل زي المطر على روسهم
طبعا كلنا عارفين قداش الامة الاسلامية خشت في عقلها وطلعت اول مابدا القصف
واحنا الليبيين طول حتى قبل القصف بعتنا السفينة مروة المليئة بالمساعدات
وبعد القصف بعتنا طائرات بالامدادات وباش ننقلو الجرحى لمستشفياتنا
وتوا كيف باعتين سفينة
والحمد لله
يعني حكومتنا طلعو تريس وجزاهم الله كل خير
لكن ..
لو بلادنا اهل نخوة .. احنا البسطاء شن دورنا ..؟؟
مصرف الامة فتحو فيه باب التبرعات لغزة
تحت حساب76611
اللي يقدر طبعا
باهي واللي ميقدرش
بامكانه يتبرع بالدم في اي مستشفى وعلى مدار اربع وعشرين ساعة
لان في فلسطينيين جرحى هيجيبوهم للعلاج في مستشفياتنا واكيد هيحتاجو دم
راهو فيهم اطفال ونساء وشباب زي الورد
يلا خلونا نرضو ربنا ونرضو انفسنا
ونديرو الصح اللي لازم نديروه
لاننا ببساطة ولاد اصول
بارك الله فيكم
والله اعلم
الجمعة يناير 02, 2009 8:10 am
